ევროკავშირში ცხოველური წარმოშობის სურსათის ბიზნეს-ოპერატორად ითვლება ყველა პირი, რომელიც კომერციული მიზნით ახორციელებს რომელიმე შემდეგ საქმიანობას:
- შინაური ცხოველების/ფრინველების ცოცხლად ტრანსპორტირება დასაკლავად, დაკვლა-გატყავება, ხორცის დაჭრა და ძვლების მოშორება, ხორცის შენახვა და ტრანსპორტირება; აგრეთვე ნანადირევის მიღება-დამუშავება ბაზარზე განთავსების მიზნით;
- დაკეპილი (გატარებული) ხორცის, მომზადებული (შეზავებული) ხორცის ან ძვლებიდან მექანიკურად გამოცალკევებული ხორცის ან ხორცპროდუქტების წარმოება;
- ცოცხალი ორსაგდულიანი მოლუსკების მოშენება-მოგროვება, დამუშავება, შეფუთვა, ტრანსპორტირება.
- თევზის მოშენება, დაჭერა, მოკვლა, გამოშიგვნა, გაყინვა, შეფუთვა, ტრანსპორტირება, დამუშავება, ფილეს ან მექანიკურად გამოცალკევებული ხორცის წარმოება, თევზპროდუქტების წარმოება;
- შინაური ჩლიქოსანი ცხოველების წველა, რძის მოგროვება, თერმული დამუშავება, შეფუთვა, ტრანსპორტირება, რძის პროდუქტების წარმოება;
- კვერცხის წარმოება, შეფუთვა-დაფასოება, კვერცხის პროდუქტების წარმოება;
- ბაყაყის ფეხებისა და ლოკოკინების დამუშავება-მომზადება ადამიანის მიერ მოხმარებისთვის;
- ცხოველის ცხიმების გადადნობა. ჟელატინისა და კოლაგენის წარმოება.
- კუჭის, შარდის ბუშტის, ნაწლავების დამუშავება ბაზარზე განთავსების მიზნით.
ყველა ასეთი პირი ვალდებულია არა მხოლოდ დარეგისტრირდეს სურსათის ბიზნეს-ოპერატორად, არამედ მიიღოს აღიარება (approval) - საიდენტიფიკაციო ნომერი ცხოველური წარმოშობის სურსათის ბიზნეს-ოპერატორების რეესტრში. აღიარების მისაღებად ობიექტი ერთხელ მაინც უნდა შემოწმდეს სახელმწიფო ინსპექტორის მიერ. მხოლოდ ამ აღიარების შემდეგ შეუძლია ბიზნეს-ოპერატორს ზემოთ ჩამოთვლილი საქმიანობების განხორციელება.
ამ საქმიანობების წარმოებისას დაცული უნდა იყოს არა მხოლოდ ჰიგიენის ზოგადი წესები, არამედ აგრეთვე კონკრეტული საქმიანობისთვის დადგენილი სპეციალური წესებიც.