Notice: Undefined index: lastart in D:\wwwroot\csrdg\asocireba.ge\httpdocs\show_article.php on line 96



სურსათის უვნებლობის სახელმწიფო მართვა

სახელმწიფოს მიერ ბაზარზე არსებული სურსათის უვნებლობის მართვაში ვგულისხმობთ ბაზრის მოთამაშეთა შორის პასუხისმგებლობების გადანაწილებას, შესაბამისი ვალდებულებების დადგენას და ამ ვალდებულებების შესრულების უზრუნველყოფას (დეტალებისთვის იხ. ევროკავშირში სურსათის უვნებლობის სფეროს მართვის ძირითადი პრინციპები). ეს საკითხები ევროკავშირში განსაზღვრულია ე.წ. 'სურსათის ძირითადი კანონით" (რეგულაცია 178/2002) და რიგი თანმდევი აქტებით.

სურსათის უვნებლობის უზრუნველყოფის ძირითადი ევროპული პრინციპების საქართველოს კანონმდებლობაში გადმოტანა ჯერ კიდევ 2010 წლის "სურსათის უვნებლობის სფეროში ყოვლისმომცველი სტრატეგია და საკანონმდებლო მიახლოების პროგრამით" იყო გათვალისწინებული. 

ვალდებულებები ასოცირების შეთანხმების ფარგლებში მომზადებული აპროქსიმაციის განრიგის მიხედვით: სურსათის უვნებლობის სახელმწიფო მართვის დამდგენი ნორმების ძირითადი ნაწილის საქართველოს კანონმდებლობაში გადმოტანის დასრულება 2015 წელსაა გათვალისწინებული. თუმცა შემდგომ წლებში აგრეთვე გადმოტანილი იქნება მთელი რიგი ნორმატიული აქტები, რომელიც სურსათის უვნებლობის კონტროლის ზომებს აზუსტებს. ასე:

  • 2016 წელს გათვალისწინებულია 2006/677/EC გადაწყვეტილების გადმოტანა, რომელიც სახელმწიფო კონტროლის დროს საწარმო შემოწმების (აუდიტის) სახელმძღვანელო პრინციპებს ადგენს;
  • 2017 წელს გათვალისწინებულია 94/360/EC გადაწყვეტილების და 669/2009 რეგულაციის გადმოტანა, რომლებიც შესაბამისად ცხოველური წარმოშობის პროდუქტების და მცენარეული წარმოშობის პროდუქტების იმპორტისას ტვირთის სხვადასხვა ტიპის შემოწმების სიხშირეებს ადგენს. ამავე წელს გადმოტანილი იქნება 2011/91/EU დირექტივა, რომელიც სურსათზე მისი პარტიის მითითების ვალდებულებას ადგენს;
  • 2019 წელს გათვალისწინებულია 2007/363/EC - გადაწყვეტილების გადმოტანა, რომელიც სახელმწიფო კონტროლის მრავალწლიანი გეგმის მომზადებისათვის სახელმძღვანელო მითითებებს შეიცავს.
  • 2021 წელს გათვალისწინებულია ხორცში ტრიქინელას ცისტების კონტროლის ზომების დამდგენი 2075/2005 რეგულაციის გადმოტანა;
  • 2023 წელს გათვალისწინებულია 28/2012 რეგულაციის გადმოტანა, რომელიც ადგენს გარკვეული ტიპის შედგენილი პროდუქციის[3] იმპორტის სერტიფიცირების პროცედურებს;
  • 2025 წელს გათვალისწინებულია ნედლი რძისა და რძის პროდუქტების იმპორტის სერტიფიცირების პროცედურების განმსაზღვრელი 605/2010 რეგულაციის გადმოტანა ქართულ კანონმდებლობაში.

გარდა ამისა, გათვალისწინებულია კონტროლის განსაკუთრებული ზომები ზოგიერთი ტიპის სურსათისთვის.

  • ასე, 2019 წელს გადმოტანილი იქნება 258/97 რეგულაცია, რომელიც ადგენს ე.წ. "ახალი ტექნოლოგიებით"[1] სურსათის დამზადებისათვის სავალდებულო წინასწარი ავტორიზაციის პროცედურას. გათვალისწინებულია აგრეთვე  97/618/EC რეკომენდაციის გადმოტანა, რომელიც ასეთი ნებართვის მისაღებად გასათვალისწინებელ სამეცნიერო ასპექტებს ეხება.
  • 2024-2025 წლებში დაგეგმილია 210/2013 და 211/2013 რეგულაციების გადმოტანა, რომლებიც ითვალისწინებს სხვა მცენარეული წარმოშობის სურსათისგან განსხვავებული, განსაკუთრებული კონტროლის დაწესებას ღივების[2] წარმოებასა და იმპორტზე.
  • აპროქსიმაციის ბოლოს კი, 2026 წელს, გადმოტანილი იქნება 1999/2/EC და 1999/3/EC დირექტივები, რომელიც ადგენს კონტროლის განსაკუთრებულ წესებს სურსათის ისეთი საწარმოებისათვის, რომელიც მაიონიზებელი დასხივების მეთოდებს იყენებს.

შესრულება: სურსათის უვნებლობის სახელმწიფო რეგულირების მოთხოვნების ძირითადი ნაწილი საქართველოს კანონმდებლობაში გადმოტანილია, თუმცა პრობლემატურია მათი სათანადოდ განხორციელება, განსაკუთრებით დაავადებათა რისკის შეფასების და ამ რისკების მართვის ადექვატური ზომების შემუშავების პროცედურების არსებობის თვალსაზრისით.

-----------------

[1] იგულისხმება ტექნოლოგიები, რომელიც 1997 წლამე არ გამოიყენებოდა.

[2] სხვადასხვა მცენარის გაღვივებული თესლები, რომელიც სალათებში, უმად გამოიყენება.

[3] იგულისხმება სურსათი, რომელიც შედგება როგორც მცენარეული , ასევე ცხოველური წარმოსობის ინგრედიენტებისგან.

ასოცირების ხელშეკრულების მუხლები
ევროკავშირის კანონმდებლობა
საქართველოს კანონმდებლობა

აქტები მოცემულია 2018 წლის აგვისტოს მდგომარეობით

გაუქმებული აქტები: