Notice: Undefined index: lastart in D:\wwwroot\csrdg\asocireba.ge\httpdocs\show_article.php on line 111



2024:
ბოლო განახლება: 2018-12-15

2024 წელს დაგეგმილია საქართველოს კანონმდებლობაში ჰიგიენის დამატებითი მოთხოვნების გადმოტანა ღივების (გაღვივებული თესლი, რომელსაც უმად, თერმული დამუშავების გარეშე მიირთმევენ) წარმოებისათვის. ეს განსაკუთრებული მოთხოვნები გამომდინარეობს 2011 წელს ევროკავშირში (ძირითადად გერმანიაში) ღივების საშუალებით კოლიბაქტერიის პათოგენური ფორმის - ე.წ. შიგატოქსინ-წარმომქმნელი ეშერიქია კოლის (Shiga toxin-producing E. coli) გავრცელებით, რამაც მძიმე დაავადების აფეთქება გამოიწვია (დაავადდა 9 ათასზე მეტი ადამიანი, დაიღუპა 56). სწორედ ამგვარი დაბინძურების თავიდან ასაცილებლად შემოღებულია დამატებითი ჰიგიენური მოთხოვნები ღივების წარმოებისთვის, სადაც მოთხოვნილია თესლთან ან ღივთან შეხებაში მყოფი ყველა ზედაპირის, ჭურჭლის, ხელსაწყოს, დანადგარის განსაკუთრებული სისუფთავე, რეგულარული რეცხვა და დეზინფექცია (შედარებისთვის იხ. ჰიგიენის ზოგადი წესები).

ამავე პერიოდიდან დაიწყება ღივების ან ღივების წარმოებისთვის გათვალისწინებული თესლის იმპორტის კონტროლი საგანგებო სერტიფიკატის მეშვეობით.

2024 წელს გათვალისწინებულია საქართველოს კანონმდებლობაში 210/2013 რეგულაციის გადმოტანა, რომელიც ღივების[1] წარმოების წინასწარი აღიარების პოცედურას აფუძნებს. ღივების იმპორტზე განსაკუთრებული კონტროლის დაწესება 2025 წელს არის გათვალისწინებული.

2024 წელს დაგეგმილია ქართულ კანონმდებლობაში გადმოტანილი იყოს 2007/42/EC დირექტივა, რომელიც სურსათის შესაფუთ მასალად აღდგენილი ცელულოზის ფირის გამოყენების უვნებლობის ზომებს ეხება. დირექტივა შეიცავს იმ ნივთიერებების ამომწურავ ჩამონათვალს, რომელიც დაიშვება სხვადასხვა ტიპის ცელულოზის ფირის დამზადებისას და მათი გამოყენების ნორმებს. იგი აგრეთვე ადგენს ზოგად წესს, რომ ცელულოზის ფირის შეღებილი მხარე სურსათს არ უნდა ეხებოდეს.

ამავე წელს არის გათვალისწინებული 85/572/EEC დირექტივის გადმოტანა, რომელიც 2022 წელს მისაღები პლასტმასის ტარის უვნებლობის მოთხოვნებს ავსებს პლასტმასის მასალის გამოცდის წესის დადგენის გზით.

2024 წელს საქართველოს კანონმდებლობაში გადმოტანილი უნდა იყოს 432/2012 რეგულაციაში ასახული, სურსათის ეტიკეტზე გამოსაყენებლად ნებადართული ჯანმრთელობასთან დაკავშირებული წარწერების ჩამონათვალი. ეს ჩამონათვალი ხელმისაწვდომია ევროკომისიის ვებ-გვერდზე განთავსებულ საგანგებო რეესტრში. ჯანმრთელობაზე კონკრეტული სურსათის ზემოქმედებასთან დაკავშირებული სხვა წარწერების დატანა სასურსათო პროდუქტებზე აიკრძალება (გარდა ზოგადი ხასიათის წარწერებისა).

2024 წელს დაგეგმილია ქართულ კანონმდებლობაში 124/2009 რეგულაციის გადმოტანა, რომელიც ადგენს ფარმაკოლოგიურად აქტიური ნივთიერებების ნარჩენების ზღვრულ დასაშვებ ოდენობებს სურსათში იმ შემთხვევებისთვის, როდესაც ეს ნივთიერებები ცხოველთა საკვებში არა გამიზნულად, არამედ შემთხვევით, კვალის სახით არის მოხვედრილი. რეგულაცია ეხება მხოლოდ კონკრეტული ტიპის სამკურნალო საშუალებებს (კოკციდიოსტატებს და ჰისტომონოსტატებს), რომელთა დამატება ცხოველთა საკვებში დაშვებულია და ამდენად ისინი კვალის სახით შესაძლოა ცხოველთა საკვების სხვა (უდანამატო) პარტიებშიც მოხვდეს.

------------------

[1] სხვადასხვა მცენარის გაღვივებული თესლები, რომელიც სალათებში, უმად გამოიყენება.

ასოცირების ხელშეკრულების მუხლები
ევროკავშირის კანონმდებლობა
  • 210/2013 რეგულაცია - კონტროლის დამატებითი მოთხოვნები ღივების წარმოებისთვის
  • 211/2013 რეგულაცია - სერტიფიკატი ღივების ან მათი საწარმოებელი თესლის იმპორტისთვის.
  • 208/2013 რეგულაცია - ღივებისა და მათი წარმოებისთვის გამოყენებული თესლების მიკვლევადობასთან დაკავშირებით
  • რეგულაცია 432/2012 - სურსათის ჯანმრთელობაზე ზემოქმედებასთან დაკავშირებული ნებადართული წარწერების ჩამონათვალი და მათი გამოყენების პირობები.
  • 2007/42/EC დირექტივა - ცელულოზის ფირისგან დამზადებული შესაფუთი მასალა და ტარა;
  • 85/572/EEC დირექტივა - პლასტმასის ტარის გამოცდის წესი;
  • რეგულაცია 124/2009 - დაშვებული გამონაკლისები ზოგიერთ ფარმაკოლოგიურ ნივთიერებებთან დაკავშირებით
  • 579/2014 რეგულაცია - თხევადი ზეთების ზღვით ტრანსპორტირების საკითხები.
საქართველოს კანონმდებლობა