მიმდინარეობს სტატიის შინაარსის განახლება
2018 წელს ქართულ კანონმდებლობაში გადმოტანილი უნდა იყოს სასურსათო ცხოველების ჯანმრთელობის ჩარჩო-დირექტივა 2002/99/EC, რომელიც ადგენს ზოგად წესს: ცხოველური წარმოშობის პროდუქტები არ უნდა დამზადდეს დაავადებული ცხოველებისგან, ან ცხოველებისგან, რომელიც დაავადებულ ცხოველთან კონტაქტში იმყოფებოდა, ხოლო იმ შემთხვევაში, თუკი ცხოველი არც დაავადებულია და არც იმ ნახირიდანაა, რომელშიც დაავადებული ცხოველები აღმოჩნდა, არამედ უბრალოდ იმ ტერიტორიიდანაა, სადაც ეს ნახირი/ფერმა განთავსებულია, სურსათის დასამზადებლად მისი ხორცის/რძის გამოყენება დაიშვება მხოლოდ სათანადო დამუშავების/გაუვნებელყოფის შემთხვევაში.
აგრეთვე 2018 წლისთვისაა გათვალისწინებული ვეტერინარული სამკურნალო საშუალებების მარეგულირებელი ძირითადი აქტის, ვეტერინარული სამკურნალო საშუალებების კოდექსის (2001/82/EC დირექტივა) აპროქსიმაცია.
გაგრძელდება აგრეთვე ცხოველების/ფრინველების კონკრეტულ დაავადებათა აღმოფხვრაზე მიმართული ღონისძიებების აპროქსიმაცია. კერძოდ, 2018 წელს სამიზნე დაავადებებია ბლუტანგი (2000/75/EC დირექტივა) და ექინოკოკოზი (რეგულაცია 1266/2007).
2018 წელს დაიწყება არასასურსათო დანიშნულების ცხოველების გადაადგილების კონტროლის მარეგულირებელი აქტების აპროქსიმაცია. კერძოდ, გადმოტანილი იქნება 998/2003 რეგულაცია, რომელიც ადგენს შინაური ბინადარი ცხოველების ჯანმრთელობის მოთხოვნებს მათი არაკომერციული მიზნით გადაადგილებისას.